Ukai Dayak patut beterima kasih, tang perintah BN


LANSA PENEMU: Apin lama tu tadi, Perintah Besai udah ngemendar bansa Dayak di kelala nyadi siti bansa di Malaysia, lalu badu agi ngumbai kitai bansa Dayak, Bangsa Lain Lain ba semua pom tauka borang perintah.

Gaga meh sida bala politician, lalu meri jaku puji, muji Menteri Besai Najib Razak laban iya ngelala bansa Dayak.

Sekeda kitai sebuat mega muji Kepala Menteri menua Sarawak, Adenan Satem, lalu ngumbai kitai Dayak berutang budi ba iya.

Sebedau kitai manjung ngumbai diri udah datai di pala wong, aku mai kitai sebuat berunding dalam agi.

Nama kebuah lebih 50 taun ke udah, sida iya enda berat ka kitai bansa Dayak di menua tu, lalu enda ngelala bansa kitai? Nama kebuah enda bebasa ka bansa kitai Dayak?

Di menua Sarawak ditu, kitai Dayak nya siti bansa ke mayuh tuboh, mayuh undie. Enti enda ari undi kitai Dayak di Sarawak, nyangka pedis Barisan Nasional (BN) menang, ulih megai perintah di menua tu.

Nya-alai enda patut kitai Dayak nyau beterima kasih ka perintah ba pekara ke siti tu! Perintah menua Sarawak serta enggau Perintah Besai ke patut beterima kasih ngagai kitai bansa Dayak ke meruan ngundi BN tiap tiap maya bepilih!

Perintah BN menua Sarawak ka amat berutang budi ba kitai bansa Dayak, laban enti enda ari sukong, ari undi kitai Dayak, nyangka pedis BN menang lebuh maya bepilih.

Nadai patut kitai beterima kasih laban perintah ngelala kitai bansa Dayak. Ari jeman kelia, kitai Dayak di menua tu endang ngumbai diri bansa Dayak, ukai Bangsa Lain Lain. Nya-alai ngelala kitai nyadi siti bansa dalam Malaysia endang hak kitai bansa Dayak.

Siti pekara ke patut di perati kitai bansa Dayak di menua tu. Taja kitai udah di kelala nyadi siti bansa dalam Malaysia, ba segi pengawa perintah, kati kitai bansa Dayak bisi di bagi bela?

Ba scholarship, bela kini bagi di beri perintah ngagai kitai bansa Dayak? Kati amat ampit, amat di bagi bela kitai Dayak di menua tu?

Tiap tiap opis perintah, sekali ka nya opis Perintah Besai tauka opis perintah menua Sarawak tu, urang ke megai kuasa, urang ke nyadi kepala, nya ukai bansa kitai Dayak.

Ba segi pemansang, baka pemansang jalai alun, kati manah jalai alun ke nuju menua kitai bansa Dayak, enti di pebanding enggau menyadi kitai bansa Melayu?

Pia mega, ba segi pengawa dagang, ampit kitai Dayak di beri lisin bedagang? Kati ampit kitai di beri api electric enggau ai paip ke beresi?

Ba senentang pelajar sekula, kati ampit bala anak kitai bansa Dayak di beri scholarship, nampung pelajar ngagai university di menua tasik?

Ngelala bansa kitai Dayak endang hak kitai urang asal di menua Sarawak. Nama kebuah nyau ka 50 taun perintah ngumbai kitai bansa Dayak nya Bangsa Lain Lain?

Perintah ke lubah ngelala kitai. Kati patut kitai beterima kaseh laban kitai di kelala nyadi siti bansa di Malaysia?

Perintah nyau ke diatu ngelala kitai bansa Dayak, kati tu ari tegal deka bepilih di menua Sarawak kini? Kati tu di kena nginti undi?

Kitai Dayak anang enda berunding, nama budi, nama upah ke di beri perintah ngagai kitai Dayak ke meruan ngundi BN?-The Ant Daily
Labels:

Post a Comment

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget